Psixoloqlar deyirlər ki, qəlbən tənha insanlar istirahət günlərini və bayramları xoşlamırlar. Çünki insanın ən çox tənhalıq hissi məhz bu günlərdə özünü büruzə verir. Bu cür insanların ən "bədbin" bayramı məhz Yeni ildir. "İli tək qarşıladımsa, demək, həmin ili tək qalacağam" fikri onları tərk etmir.

Yeni ili gözəl keçirmək üçün məsləhətlər təqdim edirik:

Yeni ili tək qeyd etməyin müsbət cəhətləri:

• İlk öncə düşün ki, heç kimə hədiyyə almaq üçün xərcə düşməyəcəksən.

• Sonra təsəvvür et: Səni qonaq çağırıblar. Bayram axşamı bər-bəzək içində zala daxil olursan. Hər kəsin gözü səndədir. Diqqəti sənə yönələn kişilərin arvadları paxıllıqdan özlərinə yer tapmırlar.

• Masa arxasında sənin ünvanına səslənən sağlıqlar əks-cinsin heç bir nümayəndəsində qısqanclıq doğurmayacaq.

• Paltarına və ya saç düzümünə görə heç kim səndə nöqsan axtarmayacaq.

• İstədiyin kimi əylənib, hər kavalerlə rəqs edə biləcəksən.

Bu tənhalıqdan istifadə et. Bu şansı bir daha heç vaxt əldə edə bilməyəcəksən. Bəlkə də bu ərəfədə özünə layiqli sevgili tapdın...

Əgər Yeni ildə hələ də təksənsə, bayramı əyləncəli və yaddaqalan etmək məhz öz əlindədir. Necə?

Variant 1 - Şoppinq

Bu ərəfədə alış-veriş etmək elə xoşdur ki…

• Evini əsl bayram əhvalına uyğun olaraq, rəngbərəng işıqlar və zərlərlə bəzəyib, bayram süfrəsi aç.

• Pəhrizi unudub, masaya ekzotik meyvələr, cürbəcür salatlar, isti xörək və içkilər qoy.

• Yemək stolunu yığışdırandan sonra xırda işlərə vaxt itirməmək üçün çay stoluna lazım olan cürbəcür şirniyyatları, konfet, şokolad və çərəzləri əvvəlcədən jurnal stolunun üstündə hazırla.

Variant 2 - Hədiyyə

Evində çoxlu qonaqlar olacaq? Onda bu il əməlli-başlı xərcə düşəcəksən. Elə maraqlısı da odur ki, daha bir adama deyil, bir neçə dosta hədiyyə almalısan. Hər birinin xasiyyətinə uyğun maraqlı, «şirin», şən hədiyyə almaq elə də asan deyil. Bu, sənin vaxtını alacaq. Amma əmin ol ki, günün olduqca maraqlı keçəcək.

Variant 3 - Ünsiyyət

İndi vaxt gəldi qonaqlıq təşkil etməyə… Sənə yaxın olan cütlükləri, tək dostlarını və onların dostlarını 31-i gecə çağırıb, əsl şadyanalıq olacağını bildir. Yaşından və cinsindən asılı olmayaraq, hər kəs bu məclisdə iştirak edə bilər. Əvvəlcədən musiqi tərtibatı et və diskləri növbələşdir.

Yeni il gecəsi qadağandır

• Əgər özünü tənha hiss edirsənsə, nəbadə disko-klublara qatılasan.

• Yalnızlığını ört-basdır etmək üçün tanımadığın insanların məclisinə qatılma.

• Əgər Yeni il gecəsi gəzmək istəyirsənsə, bunu tək etmə. Küçədə sərxoşlara rast gəlsən, imdadına kim çatacaq?!

Tənhalıq da xoşbəxtlik gətirir.

İdeya 1

İnternetdə turizm şirkətləri ilə maraqlanıb, Yeni ili keçirmək üçün maraqlı və məqsədəuyğun bir ölkə tapıb, aviabilet sifariş et. Bu, istirahət mərkəzi və ya hansısa bir pansionat da ola bilər. Maraqlı dostlarla unudulmaz
vaxt keçirməyin əsl zamanıdır.

İdeya 2

Və ya… Yeni il gecəsi şou-proqram olan restoranda kiçik bir masa sifariş et. Bir də baxacaqsan ki, ətrafındakı
masalarda o qədər sənin kimi tənha insanlar var ki… Amma unutma: əsas kəmiyyət yox, keyfiyyətdir.

Diqqət et!

• Sən əsrarəngiz, lakin olduğun kimi görünməlisən.

• Geyimində çox açıq-saçıqlığa yol vermə. Unutma ki, əyləncəyə tək qatılacaqsan.

• Tənhalığını içki ilə ovundurma. Hətta dilinə içki vurmasan yaxşıdır. Kim zəmanət verə bilər ki, sən sərxoş olmayacaqsan?!

İdeya 3

Bayram gecəsi keçmiş sevgilinə zəng edib, onun da bayramını təbrik edə bilərsən. Bəlkə o da bu axşam tənhadır? Kim bilir, bəlkə də sadə bir təbrik mesajı və ya zəng aranızdakı soyuqluğu isidəcək, Yeni ilə yeni arzularla qədəm qoymağa kömək edəcək?! /Axşam.az/